Osafjellsvegen gir tilgang til høgfjellet og gjer Osafjellet til eit spesielt godt utgangspunkt for toppturar. Vegen går heilt opp mot 1100 moh., og blir normalt brøyta eit stykke opp på fjellet gjennom vinteren.

Området byr på mange ulike turmoglegheiter gjennom ein lang sesong. Me har gått topptur her allereie i slutten av september, medan våren ofte gir svært gode forhold for lange turar og flotte nedkøyringar.

Eit meir krevjande alternativ er å starte frå Kjeåsen, den kjende fjellgarden 530 meter over Simadalsfjorden. Herifrå går turen vidare opp mot Onen, med ei lang og spektakulær nedkøyring tilbake mot Kjeåsen.

Frå dei høgaste toppane får du vid utsikt over Hardanger og mot mellom anna Hardangervidda, Vassfjøro, Folgefonna, Hardangerjøkulen og fjella kring Voss.